مشاريع استثماريه عظييييييمه

اول صيف يعدى عليا انا وصحابى منذ ان بدانا تعليم ونحن نعلم انه لن يكون هناك عام دراسى اخر بعده . فاخيرا انجزنا تعليمنا الجامعى . مجموعه من الاوباش الذين تخرجوا من عده كليات مختلفه . اذا رايتنا لن تدرى كيف حدثت هذه التوليفه من الشخصيات التى تكاد تشبه شخصيات من فيلم كروتونى . مجموعه مننا ارتاح بالها بعد ما عرفوا مصريهم من الجيش . ومجموعه اخرى لم تعرف بعد وانا من هذه المجموعه . ولكن كلنا نبحث عن فرصه لبدا وظيفه او نشاط تجارى او مشروع .

كل هذا طبيعى اى شخص يمر به فى فترتنا هذه الى ان يستقر . الغير طبيعى هى الافكار البناءه والعظيمه فى المشاريع التى نطرحها على بعضنا البعض عندما نتسامر ليلا فى الكافى .

خلونى احكيلكم على بعض المشاريع العملاقه التى نريد البدء بها . وطبعا مش هانسى اقول مين من الاوباش صاحب فكره المشروع

اول مشروع نشترى سمك ونبيع . صاحب الفكره العبقريه بيقول انه هنجيب فى اليوم ربح صافى 400 جنيه !!!!! ( صاحب الفكره جلال جلوان )

مشروع نشترى عربيه ونوزع عليها ادوات كهربائيه . صاحب الفكره بيقول برضه اننا هنجيب فى اليوم 300 جنيه ( صاحب الفكره اسلام توك توك )

مشروع تانى نربى عصافير ونبيعها . صاحب الفكره مقلش هنكسب ومش عارف هنعملها ازاى مع الانفلونزا اللى ماشيه فى البلد دى ( صاحب الفكره خالد الصياد )

مشروع غيره نعمل فطير مشلتت ونبيعه للمحلات . صاحب الفكره قالك كل حاجه سهله وسويه توزيع كله يبقى تمام ( صاحب الفكره خالد انتخه )

عندك برضه احمد النعسان اللى بيفضل قاعد معانا بس مش بيقول حاجه مجرد انه بينام واحنا قاعدين

غيره اطباق بلاستيك اللى هيا فل دى . قالك هنجيب مكنه ونعمل الاطباق ونوزع ( صاحب الفكره احمد سوسه ) مشورع تانى قالك نعمل اكياس بلاستيك .

مشروع اخر . شركه نضافه . صاحب المشروع بيقول نعمل بالاتفاق مع المجلس المحلى شركه نضافه بس عاوزه راس مال ( الحقيقه انا صاحب الفكره دى بس مش لاقى ليا لقب تريقه اقوله لانهم مش عارفين يطلعوا حاجه عليا )

دا بقى غير اكياس الملح اللى هيتباع والبلاى استيشن والكافى ومحل ادوات منزليه . ومحل الجزاره . ومكاتب المحاسبه . داحنا وصلنا لدرجه اننا هنروح نستصلح الصحرا . وطبعا كل فكره من دول ليها حد عبقرى من صحابى الاوباش

وربنا يدينا ويديكم صوله العمر ونشوف حاجه من المشاريع الفاشله دى اللى احنا اصلا مش نعرف عنها حاجه قيد التنفيذ

حوار مع النفس

كم انت غريب يا انا . بك جميع الصفات خيرها وشرها . الوحيد فى العالم الذى يفهمنى كما انا هو انا وامى . صعب التنبؤ بتصرفاتك يا فتى . لماذا تثور وتغلى كالبراكين فى مواقف عديده مع انك تكون هادئ حالم فى اوقات ومواقف اخرى . لماذا كثييييرا تتحمل كثره كلام من حولك من معارف واصدقاء واشخاص لا تعرفهم وتتقبل هذا بصدر رحب , وفى اوقات اخرى لا تستطيع تحمل اكثر من 5 دقائق من الرغى المتواصل من اى احد . احلامك تطير فى السماء ولكن اقدامك مازلت على الارض , تفكر كثيرا فى النجاح ولكنك تخاف من الفشل , عندك احساس داخلى بان الغد افضل وبكثير ولكنك تتشائم كثيرا . لماذا هذه الثقه بداخلك التى تصل لحد الغرور , ماذا فعلت فى حياتك كى تغتر به , ما الذى يميزك عن الاخرين , لماذا تشعر دائما انك مختلف , كلها مشاعر بداخلك لا يعرفها الا انت ولا تبوح بها الا لى , ماذا لو كانت كلها اوهام امن الممكن ان اكون عادى , تقليدى , روتينى . انت كسول . والمميزين لا يعرفون الكسل , انت تخاف من الفشل والناجحون يفكرون فى المزيا اكثر من التفكير فى الفشل . تؤمن كثيرا يا انا ان الله ميز كل انسان عن الاخر , ولكن ما هى ميزتك , كيف استستثمرها , الحياه بها 80 فى الميه اشخاص تقليديون , لماذا ستكون انت من العشرون الاخر , بلغت من العمر 22 وكل ما فعلته طيله هذه الفتره اشياء تقليديه .

لماذا تكره كثيرا كل ما يتعلق بالوظائف الحكوميه . مع ان كل من هم حولك يشغلون هذه الوظائف . لماذا تكون حاد الذكاء وفى نفس الوقت تصدق اشياء سخيفه لمجرد انك سمعتها من احد تثق به . تلعب الشطرنج باحتراف ولكنك كثيرا ما تنهزم بسبب اشياء تافهه

فلتدعو معى يا انا ان تكون كما تريد وان تصبح غير ما يريد الاخرون من تقليد وروتين وحياه رتيبه , فذاكره الحياه لا تستوعب الجميع فقط المميزين هم من يخلدوا فى ذاكره الحياه

عشان بحبك

عشان بحبك بتوحشينى ......... بحب اشوفك دايما فى عينى

عشان بحبك بكون حنين ..........وطيب ومخلص ومش مبين

عشان بحبك دمى خفيف ........ وراجل وجدع وشهم وجرئ

انا كل دول ومش يفرق معايا ......يشوفونى كدا او عكس كدا

لكن معاكى بيفرق كتيير ......... تشوفينى فارش شجاع نبيل

عشان بحبك بحوم حواليكى ..... واحب اشوف دنيتى بيكى

فى عنيكى ضى ينورلى طريقى ..... وخدودك ورده وتفاح وقمره

بتمشى مكسوفه ... وبابتسامه ملهوفه .... على الدنيا وجمالها

بتقولى اخويا........... وانا اقول اختى

لكن انتى حبيبتى ...... ويا عالم انتى ؟؟؟

كدا برضه معايا ....ولا انا فعلا صديق وصاحب برئ

لو كنت دول انا برضه سعيد ......... لانى هاكون معاكى وخلاص

مش تفرق معايا

لا تفرق كتيير........... بس انا راضى بقليل

اهم حاجه تكونى معايا.............. وجودك خلى لحياتى معنى

بمشى فى مكان ادور عليكى ... واتمنى اشوفك والمس اديكى

عشان بحبك خايف اقولها .......... بكتم فى قلبى سنين بطولها

معلش . مانا برضه معاكى ................ وكتيير صحاب حبوا ودابو

فى عنيكى نور مش نور صديق . يلا قوليلهاونمشى فى طريق

كله سعاده وحب وبريق ...عشان بحبك

الى اجمل عيون اسرتنى من اول ما شفتها

استرجل واشرب بريل

عارفين طبعا كلكم حمله الاعلانات بتاعت بريل . الاعلانات دى يا جماعه عملت ضجه واثاره للجدل غريبه . جروبات على الفيس بوك ومقالات صحفيه . معظم الحاجات دى بتعارض الاعلان واكتر حاجه معترضين عليها كلمه استرجل . بيقولوا هو احنا مش رجاله ولا ايه . ومش هنبقى رجاله الا لما نشرب بريل طيب والبنات يعملوا ايه ميشربوش . والرجوله ادب مش شرب بريل . يعنى فى ناس كتيير بتقول الكلام دا

بصراحه يا جماعه راى ان الاعلان دا مميز جدا وناجح جدا وذكى جدا . انتوا طبعا كلكم عارفين طعم بريل . مش اى حد يقدر يشربها لانها مره . فلازم الاعلان يقنعك انك تشرب بريل .ومش بنفع يعمل زى اعلانات المياه الغاذيه انه اللى بيشرب يستمتع وكدا لان الجمهور مش هيقتنع. فبيعمل حاجات بطريقه مضحكه تقولك ان بريل دى للرجاله . ايه المشكله فى كدا اعلان حلو وبيضحك ومقنع بصراحه الاعلان مميز جداا وتسويقى من الدرجه الاولى وكمان الجدل اللى على الحمله الاعلانيه دى فى مصلحه الشركه اكتر مهى ضدها

عامه التسويق دا فن وعلم ودراسه

المصريين وجمال مبارك

حينما نتكلم عن شخصيه عامه فلابد انا ننظر الى الايجابيات التى فعلتها هذه الشخصيه له وللمجتمع وايضا السلبيات ونفاضل ايهما اغلب على الاخر .. لانه فى النهايه كلنا بشر وكلنا يخطئ ويصيب ومن هذا المزنق اتكلم عن رئيسنا حسنى مبارك وجمال مبارك الرئيس القادم رغم عنا

اه نسيت اقول حاجه . انه لما نيجى نتكلم على شخصيه عامه لازم يكون الكلام على وزن الشخصيه .. يعنى ايه الكلام دا ؟ يعنى مثلا لو حبيت اتكلم عن رئيس دوله مينفعش اقول انه من الحاجات اللى عملها كويسه انه اتبنى كوبرى فى عصره لان دا رئيس دوله مش بياع بطاطا ولازم تكون انجازات حقيقيه تقارن بقيمه المنصب اللى هو فيه

نيجى بقى لحسنى مبارك .. الراجل دا يا جماعه بيحكمنا بقاله 28 سنه

الانجاااااااااااازات
اتبنى فى عصره كبارى كتييره زى كوبرى 6 اكتوبر اللى نص الوقت مقفول .رجعلنا طابا.صاحب الضربه الجويه الاولى

اممممممممممم ايه تانى بصراحه معدتش لاقى مهو برضه لسه ماخدش الفرصه كامله يعنى 28 سنه هيعمل فيهم ايه ولا ايه ربنا يكون فى عونه

الوكساااااااااااااااااااات
طيب نبدا بالاقتصاد اللى هو من الاخر اكل العيش .. كفايه انى اقول ان القلم الرصاص ابو 50 قرش صنع فى الصين واندونسيا ودول تانيه . مش محتاج بقى اقول معدل التنميه والكلام دا لانه بيطلع من الحكومه .اقولكم بلاش اى حاجه من دول تحكموا بيها على الاقتصاد بس احكموا على الاداء الاقتصادى من عمليات بيع القطاع العام بربع التمن واحيانا اقل فى شركات اتباعت بعشر تمنها وكانت كمان شركات بتكسب

بلاش الاقتصاد مش مهم اكل العيش . اهم حاجه الصحه يا عم الحاج طول ما صحتك تمام يبقى اى حاجه تهون
طيب نشوف بقى حال المصريين فى موضوع الصحه .. بص بلاش ارقام واحصائيات وكلام كتيير انت بس خد بعضك وادخل اى مستشفى حكومى وشوف المعامله وشوف المرضى وشوف الاهتمام وقولى ايه الحال ... بلاش انت فى نطاق معارفك واقاربك وجيرانك تعرف كام واحد عنده فشل كلوى ؟ بلاش دا كام واحد عنده فيرس الكبد ؟ طيب تعرف كام واحد عدى ال45 سنه ومش بيشتكى من حاجات كتيير اوى فى جسمه ؟ اعتقد انها نسبه قليله مع ان 45 سنه دى فى اى دوله بتحترم نفسها بيكون المواطن فيها لسه شباب

يا عم المرض دا ابتلاء وربنا لما بيحب حد بيبتليه بالمرض وربنا بيحب المصرين عشان كدا الامراض معششه فى اجسامهم واهو كله تكفير ذنوب . نشوف قطاع الخدمات

نبدا بالميه .. اقول ايه ؟؟؟!!!!!! مش هاقول قولوا انتوا كام مره فى التليفزيون سمعت عن مظاهرات لمحافظات احيانا بالكامل بسبب الميه المقطوعه بالاسابيع . ولا كأن عندنا نيل !!!!
نشوف الكهربا .. بص انا لو قعدت كد االموضوع هيطول اوىىىىىىى لان الوكسات الظاهر كتيير انا مش هطول احنا عارفين ان الكهربا لغايه الوقتى بتقطع فى اماكن كتيير فى مصر بالساعات ( ملحوظه صغيره مره الكهربا قطعت فى نيويورك بدون اعلام للناس قبلهاالدنيا قامت ومقعدتش والناس رفعت قضايا بالعبيط على الحكومه والشركه ودفعوا دم قلبهم فى تعويضات ) خد بقى عندك الخدمات الحكوميه اللى بقت وسيله للعذاب لو حسيت ان عليك ذنب وعاوز تكفر عنه روح اى مصلحه حكوميه طلع اى ورقه ... شهاده ميلاد_ قيدعائلى _ بطاقه وهلم جرا

سيبك من الاقتصاد والصحه والخدمات كل دا نستحمله بس اهم حاجه موجودين فى الدنيا وبنشتغل . مهو حق من حقوق الانسان الاساسيه انه يشتغل لان الشغل بيديك كرامه وحريه اين كان الشغل بقى . بس المهم ان الشاب بعد التخرج يكون شغال لان دى سنه الحياه . صح؟ نفسىىىىىىىى الاقى احصائيه تقولنا نسبه البطاله فى مصر كام ؟ اقولكم ملهاش لزمه الاحصائيات ماحنا بنشوف بنفسنا الموضوع
انا هاخليك تعمل احصائيه . تعرف كام واحد مخلص كليه ؟ كام واحد منهم اشتغل ؟ اللى اشتغل بيشتغل فى تخصصه اللى قعد يدرس طيب بيقبض كاااااااااااااااام ؟ بس شفت الموضوع بسيط ازاى . الموضوع بقى مش محتاج دعايه ولا اعلانات ولا مذيعين ماجورين ولا البيت بيتك ولا اى حاجه من الحوارات دى

يا اخى متحبكهاش كل دى حاجات اتعودنا عليها . ماشى اقولك حاجات تانيه مستوى المعيشه . كفايه انى اقول ان فى ملايييييين عايشن فى المقابر وفى اطفال بالالالالالالالالالالاف فى الشوارع

البحث العلمى ؟ تقدر تقولى كام ميزانيته؟ كام براءه اختراع بتطلع من مصر ؟ طيب كام من اسرائيل ؟ طيب كام عالم مصرى هاجر ومرجعش ؟ ... جاوب وانت تعرف البحث العلمى فى مصر احواله ايه

بص بقى كل دا عادى اهم حاجه العداله فعلا دى اهم حاجه فى الكون الكون نفسه كل حاجه فيه قايمه على العداله على مبدا الثواب والعقاب وان المخطئ يجازى والمحسن يثاب طيب لما سفينه عليها اكتر من الف روح تغرق وصاحبها ميتحاسبش وميحصلوش حاجه عشان واصل تبقى فين العداله . لما قطر يتفحم بالف بنى ادم جواه ومحدش يتحاسب تبقى فين العداله . لما طالب اقتصاد وعلوم سياسيه يجيباامتياز يقدم للخارجه يرفضوه عشان ابوه عامل تبقى فين العداله .لما طالب يستحق انه يتعين معيد ويجى غيره عشان فى وسطه تبقى فين العداله

يا سيدى اهم حاجه الكرااااااااامه كرامه المواطن . شوف المعامله لمصريين شرفاء داخل السجون . احكيلى وقولى ايه اللى حصل للجنود اللى اتضرب عليه نار من اسرائلين على الحدود ؟ اذا كنتوا لسه فاكرين الموضوع اساسا . طيب قولى اخبار المصريين اللى بيتشغلوا فى الدول التانيه ايه

خد عندك شويه متفرقات كدا .. نسبه العنوسه . حالات الطلاق . حالات الانتحار . نسب الجريمه . اطفال الشوارع .ظاهره التحرش. المواصلات العامه والمترو والسكك الحديد. الصرف الصحى . الطرق فى مصر وحط تحت الطرق دى 50 خط لانها مهمه . الحوادث ونسبتها ( من اعلى النسب على مستوى العالم ) حريه الصحافه والاعلام بصفه عامه . حريه اقامه احزاب فى مصر

احنا رايحين على فيييييييين ؟؟؟؟؟ اخرنا ايه هنرسى على انهى بر ؟؟؟ ولما مش هيكون فى بر ؟؟؟ كله موج وضلمه واعاصير . الظاهر مش باينلها ضى

واحد يقول ورئيس الجمهوريه مسئول عن كل دا ؟ اقوله طبعا يا حيوان مسئول وسؤالك بيدل على انك غبى . لان سيدنا عمر كان خايف يتحاسب فى دابه تعثرت
28 سنه بتتغير فيهم امم اجيال كامله بتتغير واحنا زى ماحنا بالعكس بنرجع لورا .

بعد كل دا عاوزين ابنه هو اللى يسمك بعده .. بالله عليكم اى منطق يقول كدا . عارفين المنطق الوحييد ايه . انه مفيش حد من ال80 مليون يصلح انه يكون قائد لينا .

ماذا يعرف كل من الرجال والنساء عن الاخر

*´¨`*•.¸¸.•*´¨`*•.¸¸.•*´¨`*•.¸¸.•*´

*´¨`*•.¸¸.•*´¨`*•.¸¸.•*´¨`*•.¸¸.•*´





*´¨`*•.¸¸.•*´¨`*•.¸¸.•*´¨`*•.¸¸.•*´

لا تستعجب ... فانا لما اخطأ وانا اكتب هذا الموضوع ... فالذى يعرفه الجنسين عن الاخر لا شيء .. مجرد اشياء غير مفهومه . فكر جيدا ستجد ان ما يعرفه الرجل عن المرأء والعكس ما هو الا السطور الفارغه فى اول الموضوع

الله يقوينا

فلتحاول معى عزيزى القارئ ان ننظر لحياتنا من منظور شامل ما الذى نحتاجه فيها -- ما الذى نحاول جميعا الحصول عليه -- ما هو الشيء الذى نفنى حياتنا جميعا من اجله -- اعتقد هى السعاده - كيف نحقق هذه السعاده - كيف نحصل عليها هل نشتريها - هل ناخدها من الاخرين بدون مقابل - هل نسلبها من الاخرين -- الحقيقه ان مفهوم السعاده مفهوم معقد لا استطيع انا ان اعبر عنه --- كثير يحاول شراء السعاده بالمال - واخرون يحاولون شرائها بالمناصب - واخرون بالشهره - واخرون يجدون السعاده فى الملذات الحسيه كطعام وشراب وجنس وغيره من هذه الملذات كلهم مجتمعين على انهم اذا وصلوا لهذه الاشياء (المال او المنصب او الشهره او ملذات )يكونوا عرفوا معنى السعاده - ولكن ماذا سيحدث اذا ضاعت هذه الاشياء بعدما كنت تملكها اعتقد ستكون كارثه لاى مسئول عندما يزاح من على كرسيه تكون نهايه الدنيا فى نظره لماذا ينتحر رجل الاعمال الشهير عندما يعلم ان كل ثروته ضاعت لماذا يموت الممثلين من الاكتئاب بعدما يفقدوا برقيهم ونجوميتهم

كل هذه الاشياء بدون قرب من الله لا تحقق السعاده حتى وان كنت تملتكها جميعا ومازلت تمتلكها وبعيد عن خالقك ستشعر ان هناك اشياء تنقصك لن تعرف معنى السعاده الحقيقيه

تخيل معى رجل صاحب اموال كثيره ويعرف الله جيدا وضاعت هذه الاموال هل سيكون كالذى لا يعرف الله فى حياته القريب من الله سيعرف ان هذا ابلاء وان عليه ان يصبر ويحاول مره اخرى لانه خلق لتعمير الارض - صاحب المنصب القريب من الله يرتاح لخروجه من المنصب لانه ازاح عن عاتقه احساس وخوف من الخطئ وخوف من حساب ربنه

هذه هى السعاده فى نظرى ملذات فى الدنيا ولكن نتمتع بها بما يرضى الله لان ملذات الدنيا خلقها الله لننعم بها ونعمر بها الارض ما اجمل ان تكون غنى وتعطى الله حقه فى اموالك -- وما اجمل ان تكون صاحب منصب وتيسر للناس امورهم -- ما اجمل الشهره عندما تستخدمها فى مساعده الاخرين -- ما ما احلى وجبه الافطار فى رمضان بعد حرمان دام لساعات -- ما احلى الجنس عندما يكون مع زوجتك فقط -- ما احلى صله الرحم -- ما احلى التبسم فى وجه اخيك -- ما احلى احساس بمساعده لشخص محتاج

كلنا نعرف انه لا سعاده بدون الله ولكن معظمنا وانا من المعظم لا نحاول التقرب منه !!!!!!!!!!!!!

فيس بوك واخواته

هاى بيوتى شكرا على الاضافه واتمنى نكون اصحاب طول العمر

بجد انتى انسانه عسوله اول واموره اوى ومحترمه اوى وانا اول ما شفتك ارتحتلك واتمنى نكون اصدقاء فى الله

انا مستعد ادفع نص عمرى وتكلمينى بجد انتى هايله دا شرف ليا اكيد
مستني ردك وهبعتلك ايميلي وميرسي مره تانيه

على فكرة انا نفسى اتعرف عليكى بجد ياريت تكلمينى على ايميلى وانا مستعد اعملك اى حاجه


مش عارف ليه حاسس انى اعرفك من زمان ياريت تكلمينى على الايميل عشان اتاكد


ومعانا اتصال تلفونى ونقول الوووووووه معاكى ---- اخو سيد ابو حفيظه جامعه الدلتا حاسبات ومعلومات ودا الاميل بتاعى ممكن تضيفه

تعرفى انك ملاك والله انتى مش ممكن تكونى بشر مفيش بشر بالجمال دا ياريت تكلمينى على الايميل ابقى اسعد انسان فى العاااااااالم


كل الكلام اللى فوق دا تعليقات ناس على بروفيلات بنات فى مواقع زى hi5 , zorpia ,facebook

اللى يهبلك بقى ان احيانا البنات تلاقيهم وحشين وحتى لو حلويين ايه اللى يخلى الواحد يعمل كدا واحده حلوه على عينى بس انا هتفرق معايا ايه هيا ناقصه تضييع وقت انا اكلم واحده على المواقع دى لو حسيت انه فى بينا حاجه مشتركه ولو دا حصل هابعتلها رساله مش تعليق عبييط ملوش اى لزمه
الناس بقت تافه بطريقه غريبه ماشى عندى بنات فى الاكونت بتاعى على الفيس بوك وعلى هاى فيف وفيهم بنات مزز بس هتفرق فى ايه مش كل ما هاشوف واحده كدا هاروح بقى اعمل فيها عبيط والزق نفسى باى كلام عشان يمكن تحن عليا وتعبرنى ------ ايه اللى يخلينى اعمل كدا فى الفاضى
مانت لازم تحترم البنت اللى قدامك وتحترم شخصيتها وقبل كل دا تحترم شخصيتك انت

يا جماعه حد يقولى دا عادى ولا ايه بالظبط انا حاسس اننا بقينا تافهييييييييييين اوى ولا انا محبكها ولا ايه

زحمه يا دنيا زحمه

زحمه يا دنيا زحمه -زحمه وتاهو الحبايب
زحمه ومعدتش رحمه -مولد وصاحبه غايب

دا فعلا احسن وصف للشوارع فى مصر والمصالح الحكوميه وحتى المحلات الخاصه

كل حاجه فى مصر بقت زحمه وكل مكان
المشكله بقى مش فى الزحمه المشكله فى الطوااااابير
بقى فى طوابير فى كل مكاااااااان وبالذات بقى المصالح الحكوميه والله تكره حياتك لما تحب تخلص حاجه بجد حاجه بيضان اوى مش عارف ايه الزحمه الفظيعه دى والطوابير
بيقولك فى مصر اكبر عدد موظفيين حكوميين فى العالم وان الموظف فى مصر مبيشتغلش شغل حقيقى الا تقريبا ساعه والباقى مفيش شغل وتضييع وقت ولو عاوزيين امثله شوفوا المدرسييين فى المدارس

طيب لما الموظفيين فى مصر كتيير اوى زى ما بيقولوا والشغل بتاعهم الفعلى ساعه واحيانا اقل يبقى الطوابير اللى فى المصالح الحكوميه دى ليييييييييييييييييييييه يا جدعان انا هاتجنن انت تلاقى الموظفين فى المصالح دى متيسين وبيردوا حتى عليك بالعافيه طيب يا جدعان متتقوا الله وتشوفو شغلكم صح دا انت عشان تعمل اى حاجه تفضل واقف فى طابور نص ساعه ولو جت على قد كدا تبقى كويس ولما توصل للموظف يرجعك عشان حاجه هايفه وروتين متخلف وتروح تخلص اللى هو عاوزه وترجع تقف تاااااااااانى فى الصف
والله الواحد خلاص اتخنق من البلد دى واللى فيها

يونس

عصفور صغير

هذه القصه القصيره وجدتها فى حطام اشيائى واوراقى كنت قد كتبتها منذ حوالى 10 سنين ربما فى المرحلة الاعدادية ذكرتنى بمرحلة مضت كانت بها لى افكاروذكريات تكاد تكون ساذجه بالنسبة للواقع الذى نعيش الان كانت متره من عمرى ارت ان استرجعها بان اسرد هذه القصه عليكم
ملحوظه المغزى فى هذه القصه لن تجدوه الا فى السطور القليله الاخيره احببت ان اقول لكم حتى تنتبهوا وانتم تقراو السطور الاخيره

عصفور صغير

ايام قلقه يشوبها التوتر وعدم الثقه حدث انقلاب فى الحكم وتغير نظام الحكم باكمله والقائمين على الحكم خائفين من فشل محاولتهم واصبح لديهم هاجس من فشل الانقلاب فالبلاد فى وضع خطير والمناقشات والمداولات بين القائمين على التغيير كثيره ومضطربة وغير مستقره على راى واخيرا صدر القرار قرار رئيس الدولة الجديد ..على الجهات الامنية تكثيف نشاطهم هذه الايام ويجب عليهم القبض على كل من يشكون فى ولائه للدولة وللنظام الجديد او حتى اى فرد يعارض النظام او من يحاول اثاره مشاعر الجماهير ضد النظام الجديد وتم تنفيذ القرار واصبحت البلاد التى كان يقول عليها الحاكم جنة الحريات اصبحت سجن للحرية واصبحت الجهات الامنية سوطا فى يد الحاكم ............. معتقل كبير يا بلد عانيت الامرين معظم عصورك ومرت الايام ومرت السنون واذا بالحاكم الذى ضحى بحياته ليغير نظام الحكم الديكتاتورى السابق يكون اكبر ديكتاتور وطاغية شهدته البلاد منذ زمن بعيد ولكن كان هناك
فى هذه البلد من هم شرفاء مازال عندهم الكرامه والشجاعه لمواجهة الظلم رفضوا ان تكون بلادهم مرتعا لهؤلاء الفاسدين الذين افسدتهم السلطه وقرروا ان يقوموا بنفسما قام به
الحاكم منذ حوالى 20 سنة وهو الانقلاب واخذوا يخططون ويجندون من يروهم مخلصين للبلد وحددوا ساعة الصفر واستعدوا للثوره على النظام والمجاهرة بالعداء ولكن للاسف لم يكونوا كلهم كذلك فقد كان منهم مندسين عليهم كشف امرهم جميعا وادخلوا السجون لمحاكمتهم واصبح الظاغية مستفحل الفساد والظلم ولم يجرؤ احد على معارضته وعانت البلاد من الفاسد والفقر وفى احدى الخطب وقف الطاغية يحذر وينبه اى فرد يفكر فى زعزعه امن البلاد واخذ يتكلم ويهدد وينذر وانفعل انفلاعا شديدا اثناء الخطبة التى كانت فى ساحه مفتوحه حتى ظن المستمعون انه سيأمر باعدامهم جيعا ....انه لحاكم قوى لا يجرؤ احد على ان يجادله حتى وفى اثاء تهديده ووعيده اذ بعصفور صغير لا يخاف منه احد ولا يهتم به احد بالقاء قاذوراته على راس الطاغية ولا نعلم ان كان يقصد العصفور ذلك وانه رفض ان تصبح بلده بهذه الحال ام انها مجرد صدفه وجن جنون الطاغية وامر الحراس باطلاق اسلحتهم على هذا العصفور الصغير وطار العصفور بعيدا خوفا طار بعيدا تاركا على راس الطاغية اوضح وربما احقر دليل على ضعف الانسان

وخلصنا الجامعه يا معللللم

من اسبوع ويومين بالظبط كان اخر يوم لينا فى حياتنا الجامعيه وحياتنا التعليميه كلها ( ربنا يستر وميبقاش فى مواد شيل ) كانت حاجه غريبه اننا نحس اننا خلصنا خلاص جامعه يعنى الواحد مكنش عارف اذا كنت فرحان ولا زعلان

مهو ان كنا هنرتاح من هم المذاكره والدكاتره المعقده والمذكرات وتصوير الورق ايام الامتحانات ----------- فى حاجات تانيه هنتحرم منها اهمها المزز فى الجامعه وماقولكش بقى على مزز جامعه المنصوره يعنى احلى بنات يا حاج واشيك بنات وكل شين كان

وحاجه تانيه زى اللف والصرمحه فى الجامعه وبرا الجامعه والرحلات والضحك والهزار اللى اوقات مش بيكون الا فى الجامعه دا غير الصحبه الحلوه اللى هيا اهم حاجه

يعنى حاجات كتيير اوى بصراحه الواحد كان بيحبها فى الجامعه خصوصا ان كليتنا كليه لذيذه مش محتاجه تعب اوى طول السنه يعنى تجاره بقى والحدوته كلها الشهر اللى قبل الامتحانات

الوقتى بقى الواحد مش عارف يعمل ايه ملل رهيييييب ومفيش اى جديد والكافتريات بقت خنقه وماتشات تجيب الضغط وبرامج فى التليفزيون كلها وساخه ومواضيع مقرفه ------------ مش عارف حاسس كداا انى بدات ادخل فى دوامه العاطلين عن العمل مع انى لسه حتى النتيجه مظهرتش عشان ادور على شغل دا حتى من كام يوم كنت فى المنصوره بخلص حاجه وبعد ما عملت المصلحه لقيت نفسى داخل الجامعه زى ما يكون وحشتنى هههههههههه

يلا كلها ايام وبنعشها على راى الهضبه وربنا يستر فى اللى جاى

ليه مدونه مصر من البلكونه

اول حاجه ان دا اسم كتاب جديد لمحمد فتحى
عجبنى اوى الاسم والكتاب عجبنى اكتر ----- عجبنى فكره ان الواحد يبص على الوضع اللى هو فيه من فوق لان دايما لما بتشوف الحاجه من فوق بيكون ليك نظره اعمق واوضح

بصراحه انا لسه مش عارف انا هاكتب ايه فى المدونه دى بس اوقات بكون عاوز اكتب عن حاجات كتيير واوقات بشوف حاجات تخلينى هاطق من جنابى ومش ببقى عارف اعمل ايه فقلت احلى حاجه انى اعمل مدونه واكتب فيها اللى انا عاوزه

وفى الاخر كله كلام فى كلام لا هيودى ولا هيجيب

طيب مين اللى مفروض يقرا اللى انا هاكتبه ----- بصراحه مش عارف بس عامه اى واحد مخنوق او زهقان او مش لاقى حاجه يعملها او بيدور على شغل ومش لاقى ممكن يقرا اللى انا هاكتبه واى حد تانى اهلا بيه فى مدونه مصر من البلكونه


واستنوا اول مواضيعى قريب ان شاء الله

اللى واقف فى البلكونه