مصر فى الاتوبيس

ليه بيقولو المصرين بقوا مش كويسين مع بعض وبقوا بيتخانقوا مع اى حد على الصغيره والكبيره ومعدتش فى ترابط ولا التحام ولا تكافل بين المصرين وان فى عنصريه بين المسلمين والمسيحين . الكلام دا مش حقيقى بالمره المصريين طول عمرهم مع بعض فى كل حاجه وملتحمين التحام رهيب قدام اى حدث بيحصل .

هقولكم شويه امثله بتدل على الترابط الكبيير اللى بينا كمصرين , تيجى تركب الاتوبيس تلاقيك ملتحم مع اللى معاك فى الاتوبيس التحام نفسى ومعنوى وعضوى كمان وتلاقيك حاسس بانفاس اللى واقفين جنبك فى الاتوبيس وحاسس بدفئ اجسادهم وشامم كمان رائحه عرقهم ومفيش فرق بين ولد وبنت ولا بين مسلم ومسيحى , مش دا دليل كبير على الترابط اللى بين المصرين

والمدارس اللى الفصل كان 40 و50 . والجامعات اللى بيكون المدرج فيها يتسع للالاف من الطلاب مش دليل على الترابط والتلاحم اللى بين المصرين . الترابط دا اتعودنا عليه وشربناه من واحنا اطفال رضع والدليل على كدا الحضانات اللى بيكون فيها 4 اطفال واكتر

متشات الكوره , وحفلات المطربيين والمغنين اللى بيبقى الجمهور فيها على بعضه مفيش فرق بقى بين ولد وبنت ولا اى حاجه

حتى الحمامات العموميه بقى فيه الوقتى حمام رجالى وحريمى مع بعض يعنى نفس الحمام للرجال والستات , شفتوا الترابط بينا وصل لحد فيييين !!!!!!!!!!!!!

ولسه

حكمه المحبوب فى اهداء الدبدوب

فى حاجه محيرانى جدا يا جماعه ونفسى اعرف ايه السبب فيها , انا عارف ان فى بنات كتيير هتزعل منى وهتقول فيا كلام مش لطيف ويقولوا ايه الواد المعقد دا , فحاولوا يا جماعه بجد تفهمونى ايه الفايده من البتاع دا

الحاجه دى عباره عن اختراع او منتج بشععععع بيسموه الدبدوب , عارفينه طبعا , البتاع الغريب اللى بياخد اشكال مختلفه واحجام مختلفه وبيكون هديه فى المناسبات المختلفه واولها عيد الحب , ليييه بقى ايه الحكمه يعنى من الدبدوب دا , غالبا بيكون شكله وحش يخليك عاوز تبص فى حته تانيه , يعنى ملوش اى فايده وسعره بيقولوا غالى , وهديه اعتقد ملهاش اى لزمه , يعنى انا لما يجيلى دبدوب اعمل بيه اييييييييه ؟ وماعتقدش انى من النوع اللى ممكن انام وانا جنبى على السرير دبدوب , والله تبقى حاجه مش لطيفه خالص , دانا انام وجنبى مفتاح انجليزى اهون من انى انام وجنبى دبدوب .

وبعدين كنت فى اى مناسبه اقعد اقول يا رب محد يجيبلى دبدوب لان هيكون فعلا وبجد مصيره الزباله , بس سبحان الله اللى يخاف من العفريت يطلعله , والاقى حد جايبلى دبدوب وتقولى هااااااا ايه رايك , وانا طبعا مش ينفع اكسر بخاطرها , الله جميييل هايل دا حلو اوى عجبنى جدا على فكره , وغالبا بكون راميه فى اى مكان قبل ما اروح ( يارب ميكونش حد من اللى ادونى دبدوب قبل كدا بيقرا الموضوع )

وبعدين تلاقى بنت ماشيه فى الجامعه ومعاها دبدوب صغير وتلاقيها بتحضنه وتلاعبه بطريقه , تخلى اى شاب عنده هرمونات يقول ياريييتنى كنت دبدوب . وكمان تيجى تركب تاكسى تلاقى سواق التاكسى حاطط دبدوب فى التاكسى , عشان يبقى رومانسى ولطيف !!!!!!!

حتى التكاتك بقى فيها دباديب , انا مش عارف ليه حاسس ان الدباديب دى مستقصدانى .

حد يفهمنى يا جماعه ايه الموضوع دا وايه الحكمه منه , يعنى ماله الورد , ايه المشكله فى ازازه بيرفيوم جميله , ساعه شيك , ان شالله حتى ياخد حقه او حقها ناشف , لكن دبدووووب استغفر الله

القطه بوسى فى الالفيه التالته

القطه بوسى والقط ميزو كانوا قاعدين مع بعض قعده رومانسيه على ضفاف النيل , القطه بوسى تطلق تنهيده بها قدر كبير من الحزن (نياااااااو) القط ميزو مالك يا بوسى زعلانه ليه , ردت عليه وقالتله , خلاص انا زهقت من العيشه اللى احنا عايشينها دى انا معدتش قادره استحمل , كل حاجه حوليا تاعبانى , اجدادنا القطط كانت حياتهم احلى من كدا وافضل من كدا , مكنش فى دوشه ولا تلوث وكانت ميه النيل حلوه ومش بتعملهم مغص , مكنش فى عربيات بيخافو منها وهما بيعدوا الطريق , والاطفال من البنى ادمين كانوا لطاف لكن الوقتى الاطفال بيبهدلونا وفاكرنا كوره بيشوطوها , ولا كان فى اشعاعات ولا احتباس حرارى , الجو بقى صعب اوى وكله تراب وحر , انا معدتش بعرف اقعد الا بالميوه بسبب الحر , انا خلاص مش مستحمله العيشه اكتر من كدا

القط ميزو حيلك حيلك ايه كل دا , دانتى معبيه اوى , مانتى كنتى كويسه امبارح ورحنا اصدنا سمك مع بعض واكلناه , ايه اللى حصلك , لالا انتى اكيد اتحسدتى , اكيد القطه سمسمه حسدتك , انا شايفها امبارح بتبص ليكى بغل وحقد

وبعدين انتى ناسيه حاجات كتيير حلوه بتحصلنا الايام دى اجدادنا مكنوش بيحلموا بيها , عندك الاكل , الوقتى بقينا بناكل انواع كتيير من الاكل اللى بيرميه البنى ادمين , انتى نسيتى السوشى , والجمبرى والانواع التانيه من الاكل , دا غير العصاير , وكمان الوقتى بقى لينا اكل مخصوص المصانع بتصنعه لينا , واترحمنا من اكل الفيران المقرفه , وكمان الوقتى تقدرى تروحى اى مكان بسهوله , كل الحكايه تتشعبطى فى اى عربيه وتوصلك مكان مانتى عاوزه , دا غير ان فى قطط صحابنا بقوا مشاهير وبيطلعوا فى التليفزيون . وكمان الوقتى الكلاب معدتش بتضايقنا زى زمان , الوقتى بقى لينا هدوم ممكن نلبسها بدل ما كنا علطول عريانين , احمدى ربنا يا بوسى على النعمه اللى احنا فيها

بوسى اتنهدت تنهيده تانيه , وقالتله طيب اسكب بقى وسيبنى اتفرج على النيل

تفتكروا الحيوانات الوقتى عايشه احسن ولا قبل كدا ؟؟؟؟؟

فيلم اكشن بعيون مصريه

فكرت كثيرا لماذا لم نرى افلام اكشن مصريه بنفس جوده الافلام الامريكيه , عندنا ممثلين ميه ميه وعندنا امكانيات وعندنا مخرجين وكل العناصر الاخرى لنرى فيلم اكشن مصرى بمواصفات غربيه, قلت طيب ايه المانع , فكرت انى اكتب قصه لفيلم , وليه لا هو احنا مش قدها ولا ايه ولا هنخاف يعنى لالالا داحنا جامديين اوى وميه ميه وبعون الله نعمل فيلم اكشن ينافس سبايدر مان وبات مان والكات وومن كمان .

البدايه : يستيقظ البطل من النوم فى تمام الخامسه فجرا يمارس الرياضه فهو رياضى ويحب الحفاظ على رشاقته فى تمام السادسه انهى تدريبه اليومى اخد الفوطه ودخل الحمام لياخد الدوش التمام وبعد ما خرج من الحمام عمل عصير من الموز والتفاح واللبن ليمده بالطاقه وليبدا يوم جديد مليئ بالنشاط وصفاء الذهن والسعاده

,

امممممممممم بدات افكر ان غالبا عندنا مش هيعرف يعمل الحاجات دى لانه مجرد ما يدخل الحمام ويفتح المياه سيكتشف ان الميه قاطعه ومش هيعرف ياخد دوش وهيخرج وهو بيسب ويلعن فى الحكومه , قال مش مشكله ابقى استحمى فى الشغل ولما جه يعمل العصير اكتشف ان الكهربا قاطعه البطل قال سهله نضرب واحد قصب من المعصره اللى تحت العماره وخلاص .

لبس البدله وخرج عشان يروح الشغل نزل فى الاسانسير ولقى البواب مزاجه زى الفل ومبسوط وصبح عليه ركب عربيته وهو ماشى فى الطريق للشغل دخل عليه ناس بمتوسيكل وهددوه وخلوه يديهم كل الفلوس اللى كانت معاه وكمان الموبيل , البطل طبعا ماستسلمش وجرى وراهم بالعربيه وفرمل قدامهم ووقفهم دارت بينهم معركه كبيره اوى وانتصر عليهم واخد فلوسه والموبيل ورجع تانى ركب العربيه بثقه وكمل مشواره للشغل

امممممممممم برضه لقيت الحوار كدا هيبقى خيال علمى مش اكشن لانه اكيد لما جه يركب الاسانسير لقاه عطلان ونزل على السلم وهو نازل لقى البواب بتخانق مع مراته وبيلعن اليوم اللى شافها فيه وطبعا لما اتسرق وجب يجرى بالعربيه عشان ييلحق اللى سرقوه لقى الطريق مقفول ومعرفش يمشى بالعربيه وهما كانوا خلعوا بالمتوسيكل

راح الشغل لقى فى حاجات كتيير اوى محتاج يعملها والمدير قعد يساله رايه فى كذا وكذا واخد برايه

امممممممم طبعا دى برضه حاجه مستحيله لان اول ما جه الشغل لقى المدير عامل حواجبه 88 وقاله كنت فين يا بنى ادم اتاخرت نص ساعه وقعد يديله رصاص عيار 9 م

خلص شغل وراح البيت اتغدى وخطيبته كلمته قالتله لازم نخرج يا حبيبى عشان انت محتاج تغير جو الشغل والتعب قاللى قشطه وكول وفعلا خرجوا وراح مطعم هادئ وكان يوم جمييل وكان اسعد واحد فى الدنيا لان معاه حبيبته اللى هيا احلى واحده شافها فى حياته

اممممممم بصراحه لو القصه كانت كدا هتبقى رعب مش اكشن لان فى مصر منعرفش الكلام دا ومش متعودين عليه, بالذمه فى حد بيشوف خطيبته احلى واحده وبعدين مفيش اماكن هاديه فى مصرعشان ياخدها فيها

______ تصدقوا ليهم حق ميعملوش فيلم اكشن فى مصر , بلا قلبه دماغ الواحد يقوم ينام احسن________